ماریوپول کے مضافات سے 127 شہریوں کا انخلا
اقوام متحدہ اور ریڈ کراس کی بین الاقوامی کمیٹی نے یوکرین کے شہر ماریوپول کے مضافات سے 127 افراد کو نکال کر زپوریزنیا کے قصبے میں پہنچا دیا ہے، جو اس محصور شہر سے تقریباً 230 کلومیٹر دورواقع ہے۔
ان اداروں کے توسط سے 29 اپریل کو انخلا کی مربوط کوششیں کی گئی تھیں۔ پہلے مرحلے کے دوران 101خواتین، مردوں، بچوں اور عمر رسیدہ افراد کو ماریوپول میں ایزووسٹن اسٹیل پلانٹ کی خندقوں سے نکال کر باہر لایا گیا، جہاں وہ دو ماہ سے پھنسے ہوئے تھے، جب کہ ان کے شہر پو روسی أفواج کی بمباری جاری تھی۔
یوکرین کے لیے عالمی ادارہ صحت کی منیجر ، ڈورٹ نزان نے کہا ہے کہ ہمیں اس بات کا بندوبست کرنا ہوگا کہ ان نئے افراد کی جسمانی اور نفسیاتی ضرورت کو کس طرح پورا کیا جاسکے گا ، جنھیں رضاکار اور صحت کے کارکنان کی مدد حاصل ہے۔
زپوریزنیا کے استقبالیے سے بات کرتے ہوئے انھوں نے بتایا کہ جیسا کہ آپ کو پتا ہے کئی افراد اس علاقے سے اس لیے چلے گئے ہیں چونکہ لڑائی اور گولہ باری کے قریب رہنا مشکل تھا۔
نزان نے کہا کہ ماریوپول اور اس کے قریب واقع افراد زپوریزنیا آتے جاتے رہتے ہیں۔
بائیڈن کا ٹینک شکن میزائل کے پلانٹ کا دورہ، ' تیار کردہ ہتھیار یوکرینی ہیروز کے ہاتھوں میں ہیں'
امریکہ کے صدر جو بائیڈن نے ریاست الاباما کے شہر ٹرائے میں واقع اس پلانٹ کا دورہ کیا جہاں کارکن یوکرین کو بھیجے جانے والے ٹینک شکن میزائل بنا رہے ہیں۔
بائیڈن نے پلانٹ میں کام کرنے والے کارکنوں کی تعریف کرتے ہوئے کہا کہ وہ یوکرینی عوام کے لیے اپنا دفاع کرنے کو ممکن بنا رہے ہیں۔
انہوں نے پلانٹ کے ورکرز کو کہا کہ ان کے ہاتھوں سے تیار کردہ ہتھیار یوکرین کے ہیروز کے ہاتھ میں ہیں۔" آپ جو کرتے ہیں اس کے لیے آپ کا شکریہ۔"
یوکرین بحران: بلنکن غذائی عدم تحفظ پر اقوامِ متحدہ کے اجلاس کی صدارت کریں گے
اقوامِ متحدہ میں امریکہ کی سفیر لنڈا تھامس گرین فیلڈ نے کہا کہ امریکی وزیر خارجہ اینٹنی بلنکن 18 مئی کو دنیا بھر میں غذائی عدم تحفظ کے بارے میں اقوامِ متحدہ کے وزارتی اجلاس کی صدارت کریں گے۔
خیال رہے کہ یوکرین میں جنگ اور دیگر تنازعات نے عالمی سطح پر غذائی عدم تحفظ متاثر کیا ہے۔
اجلاس میں موجودہ اور مستقبل کی انسانی ضروریات کا جائزہ لیا جائے گا۔
خبر رساں ادارے ایسوسی ایٹڈ پریس کے مطابق سفیر لنڈا تھامس گرین فیلڈ نے کہا کہ امریکہ اس ماہ اقوام متحدہ کی سلامتی کونسل کی صدارت سنبھال رہا ہے اور بلنکن ایک اجلاس کی صدارت کریں گے۔
انہوں نے کہا کہ اجلاس میں سیکیورٹی کونسل کے اراکین یوکرین جنگ کی وجہ سے غذائی عدم تحفظ سے متعلق صورتِ حال کا جائزہ لیں گے۔
یورپی یونین کی روس سے تیل کی خریداری پر پابندی کی سفارش
یورپی یونین نے روس کی یوکرین میں جارحیت کے خلاف مزید پابندیاں عائد کرنے کے لیے نئی تجاویز متعارف کرا دی ہیں جن میں روس سے تیل کی خریداری پر پابندی کی سفارش بھی شامل ہے۔
یورپی یونین کی سربراہ ارسلا وان ڈیئر لین نے روس کے خلاف نئی تجاویز کا اعلان کیا جن میں چھ ماہ کے اندر خام تیل کی خریداری پر پابندی جب کہ رواں برس کے اختتام تک ریفائنڈ تیل کی درآمد پر پابندی بھی شامل ہے۔
منگل کو یورپین پارلیمنٹ میں خطاب کرتے ہوئے یونین کی سربراہ کا کہنا تھا کہ یہ اُن رکن ممالک کے لیے بہت مشکل فیصلہ ہو گا جن کا روس سے درآمد کیے گئے تیل پر انحصار کرتے ہیں۔
اُن کا کہنا تھا کہ روس پر مرحلہ وار پابندیوں کا مقصد یورپی ممالک کو یہ موقع فراہم کرنا ہے کہ وہ متبادل ذرائع سے اپنی توانائی کی ضروریات پوری کر سکیں۔