ماریوپول بدستور یوکرین کے کنٹرول میں ہے: وزیر اعظم شمائل
یوکرین کے وزیرِ اعظم ڈینیس شمائل نے کہا ہے کہ جغرافیائی طور پر انتہائی اہمیت کے حامل شہر ماریوپول بدستور یوکرین کے کنٹرول میں ہے۔
اتوار کو امریکی نیوز چینل 'اے بی سی' کے پروگرام دس ویک سے بات کرتے ہوئے انہوں نے بتایا کہ ماریوپول شہر یوکرین کی افواج کے ہاتھ سے نہیں نکلا۔ فوج قائم ہے اور وہ آخر تک لڑیں گے۔
ان کا یہ بیان روس کی اس ڈیڈلائن گزرنے کے کچھ گھنٹوں کے بعد آیا ہے جس کے تحت روس نے یوکرین کے محصور شہر میں موجود فوج سے ہتھیار ڈالنے کو کہا تھا۔
روسی صدر ولادیمیر پوٹن کے اس بیان پر کہ ماسکو جنگ جیت رہا ہے، شمائل نے کہ اگرچہ کئی شہر محاصرے میں ہیں، صرف جنوب میں خرسن شہر ہی روسی کنٹرول میں ہے۔
انہوں نے بتایا کہ یوکرین کے 900 سے زیادہ شہر، قصبے اور دیہات روسی قبضے سے آزاد کرائے گئے ہیں۔ وزیر اعظم شماہل نے یہ بھی کہا، یوکرین کا اپنے مشرقی علاقے ڈونباس میں ہتھیار ڈالنے کا کوئی ارادہ نہیں ہے۔
یوکرین کی جی سیون ممالک سے 50 ارب ڈالر کی امداد کی اپیل
یوکرین نے اگلے چھ مہینوں میں جنگ سے منسلک بجٹ خسارے کو پورا کرنے کے لیے جی سیون گروپ کے ممالک سے 50 ارب ڈالر کی امداد کی اپیل کی ہے۔
خبر رساں ادارے 'رائٹرز' کے مطابق یوکرین صفر فی صد کی شرح پر کوپن بانڈز جاری کرنے پر بھی غور کر رہا ہے۔ اتوار کو قومی ٹیلی ویژن پر بات کرتے ہوئے یوکرین کے صدر کی اقتصادی مشیر اولیہ اسٹینکو نے کہا کہ ان آپشنز پر تبادلہ خیال کیا جا رہا ہے۔
یوکرین کے وزیرِ اعظم ڈینس شمائل نے اتوار کو کہا کہ ان کا ملک 5 بلین ڈالر ماہانہ خسارے سے گزر رہا ہے۔
ایسٹر کے موقع پر پوپ کی یوکرین جنگ کے خاتمے کی اپیل
ایسٹر کے تہوار کے موقع پر پوپ فرانسس نے اتوار کو یوکرین میں امن کی واپسی کا مطالبہ کیا جسے ظالمانہ جنگ کے تشدد اور تباہی کی طرف گھسیٹا گیا ہے۔
فرانسس نے دنیا سے جنگ کی عادی نہ بننے کا مطالبہ کیا اوردعا کی کہ امید کی نئی صبح جلد نمودار ہو ۔
پوپ نے یوکرین کے بہت سے متاثرین، لاکھوں پناہ گزینوں اور اندرونی طور پر بے گھر ہونے والے افراد، منقسم خاندانوں، تنہا رہے جانے والے عمر رسیدہ لوگوں، توڑ پھوڑ کا شکار زندگیوں اور تباہ شدہ شہروں کے ساتھ ہمدردی کا اظہار کیا۔
فرانسس نے یہ بھی کہا کہ جنگ کے مصائب کے دوران، حوصلہ افزا نشانیاں بھی ہیں کیونکہ لوگ خیراتی کام کر رہے ہیں، اور خاندانوں اور برادریوں نے پورے یورپ میں تارکین وطن اور پناہ گزینوں کو خوش آمدید کہتے ہوئے ان کے لیے اپنے دروازے کھول دیے ہیں۔
روسی فوج 'جان بوجھ کر دہشت گردی' کر رہی ہے، زیلینسکی
فائر فائٹرز یوکرین کے کھرکیو میں روسی حملے کے بعد آگ بجھانے کی کوشش کر رہے ہیں
یوکرین کے صدر ولودومیر زیلینسکی نے روسی افواج پر الزام لگایا کہ وہ کھارکیو میں رہائشی محلوں پر گولے باری اور توپ خانے کے حملوں کے ساتھ "جان بوجھ کر دہشت گردی" پھیلا رہا ہے۔
ادھر جنوبی شہر ماریوپول میں یوکرین کی افواج نے ہتھیار ڈالنے کی روسی ڈیڈ لائن پر عمل درآمد سے انکار کیا ہے۔
زیلنسکی نے اتوار کو ایک ویڈیو خطاب میں کہا کہ وہ توقع کرتے ہیں کہ روس مشرقی ڈونباس کے علاقے میں "مستقبل قریب میں" حملہ کرے گا۔
روس کی جانب سے حالیہ ہفتوں میں یوکرین کے دارالحکومت کیف اور شمال کے دیگر حصوں سے اپنی افواج کے انخلاء کے بعد مغربی فوجی حکام نے کہا ہے کہ روس ان اثاثوں کو مشرقی یوکرین میں تعینات کر رہا ہے۔