روس کا کئیف میں میزائل فیکٹری پر حملے کا دعویٰ
بحیرہ اسود میں روسی پرچم بردار بحری جہاز دھماکے کے بعد ڈوب گیا۔ جس کے متعلق یوکرین نے کہا ہے کہ اسے یوکرین کا میزائل لگا تھا، جس کے نتیجے میں روس کی لڑائی میں یہ اب تک کا ایک بڑا نقصان تھا۔ اس سے یہ بھی پتا چلتا ہے کہ کیف اپنے سے کہیں بڑی طاقت رکھنے والے دشمن سے لڑنے کی جرات اور صلاحیت رکھتا ہے۔
کیف نے کہا ہے کہ اس نے ساحل پر سے میزائل فائر کر کے 'ماسکووا' کروزر کو نشانہ بنایا۔
روس نے حملے کی تصدیق نہیں کی، لیکن اتنا بتایا ہے کہ بحری جہاز طوفانی گرداب میں پھنسنے کے بعد اس وقت ڈوب گیا، جب اسے باہر نکالنے کی کوشش کی جا رہی تھی۔ جہاز میں اس سے قبل دھماکہ خیز مواد میں آگ لگ گئی تھی۔ روس نے کہا ہے کہ بحری جہاز پر سوار 500 سے زائد ملاحوں کو نکال لیا گیا ہے۔
کسی غیر جانبدار ذریعے سے عملے سے متعلق اس کی تصدیق نہیں کی جا سکی۔
روس نے یہ بات تسلیم نہیں کی کہ بحری جہاز کو یوکرینی میزائل لگا تھا۔ جمعے کے روز روس نے کیف کی ایک فیکٹری پر فضائی کارروائی کا دعویٰ کیا ہے، جہاں، بقول اس کے، جہاز شکن میزائل تیار کیے جاتے تھے اور ان کی مرمت کی جاتی تھی، جس سے انتقامی کارروائی کا پتا لگتا ہے۔
'ماسکووا' بحیرہ اسود میں موجود روس کا سب سے بڑا بحری جہاز تھا، جس پر گائیڈڈ میزائل نصب تھے، جس سے ساحلی علاقے کو نشانہ بنانے اور طیاروں کو مار گرانے کی صلاحیت موجود تھی، اور راڈار نصب تھا جس سے بحری بیڑے کو فضائی دفاع کی مدد فراہم کی جاتی تھی۔
24 فروری کو لڑائی کے پہلے روز اس بحری جہاز سے ایک جزیرے پر یوکرین کا دفاع کرنے والے فوجی دستے سے کہا گیا تھا کہ چوکی خالی کر دو، ہتھیار ڈال دو؛ جہاں سے انھیں گالیوں پر مبنی ایک جوابی پیغام موصول ہوا تھا۔ کل جب یہ بحری جہاز ڈوب رہا تھا اسی وقت کیف نے ریکارڈ کیے گئے اسی جواب کو نشر کیا۔
رات گئے اپنے خطاب میں، صدر ولودیمیر زیلنسکی نے اسی جوابی پیغام کا حوالہ دیتے ہوئے، اپنی فوج کو خراج تحسین پیش کیا۔ بقول ان کے، ان جَری جوانوں نے روس کو بتا دیا ہے کہ ''تمہارے بحری جہاز ڈوب کر نیچے تہہ تک جا سکتے ہیں''۔
یوکرین: فوج ماریوپول کے گرد روسی محاصرہ توڑنے کے لیے کوشاں
یوکرینی صدر ولودیمیر زیلنسکی کا کہنا ہے کہ یوکرین ماریوپول کے گرد روسی محاصرے کو توڑنے کے لیے کوشاں ہے جبکہ جنوبی شہر پر روسی حملے جاری ہیں۔
زیلنسکی کا جمعے کو مزید کہنا تھا کہ روس نے دھمکی دی ہے کہ وہ دارالحکومت کیف پر میزائل حملوں میں اضافہ کر سکتا ہے۔
یوکرینی صدر کا قوم سے رات کے خطاب میں کہنا تھا کہ انہوں نے ملٹری کے عہدیداروں سے ملاقات میں ماریوپول میں صورت حال سے متعلق بات چیت کی ہے۔
ان کا مزید کہنا تھا کہ ابھی تفصیلات فراہم نہیں کی جا سکتیں تاہم ان کے بقول وہ اپنے شہریوں کا تحفظ یقینی بنانے کے لیے تمام تر کوششیں کر رہے ہیں۔
صدر کا مزید کہنا تھا کہ فوج کی میدان جنگ میں جیت بہت اہمیت رکھتی ہے تاہم ان کے بقول وہ ابھی بھی اتنی تعداد میں نہیں ہیں کہ ملک کو قابضین کے قبضے سے چھڑوا سکیں۔
یوکرین: کیف اور کیوو میں دھماکے، ریسکیو کا عمل جاری
یوکرین کے دارالحکومت کیف اور مغربی شہر لیوو میں ہفتے کی صبح دھماکے سنے گئے۔ جبکہ کیف کے میئر کا کہنا ہے کہ شہر مضافاتی علاقوں میں ریسکیو کا عمل جاری ہے۔
تاہم اب تک ہلاکتوں کے بارے میں اطلاعات موصول نہیں ہوئیں۔
یوکرینی صدر ولودیمیر زیلنسکی کا کہنا ہے کہ روس کے ساتھ سات ہفتوں سے جاری جنگ میں اب تک 2500 سے 300 یوکرینی فوجی ہلاک اور لگ بھگ 10 ہزار فوجی زخمی ہو چکے ہیں۔ تاہم کسی بھی شہری کی ہلاکت کی اطلاعات نہیں ہیں۔
زیلنسکی کا امریکی نشریاتی ادارے ‘سی این این’ سے جمعے کو گفتگو میں کہنا تھا کہ 19 ہزار سے 20 ہزار روسی فوجی اب تک جنگ میں ہلاک ہو چکے ہیں۔
دوسری طرف ماسکو کا پچھلے ماہ کہنا تھا کہ اب تک اس جنگ میں ایک ہزار 351 روسی فوجی ہلاک اور 3 ہزار 825 زخمی ہوئے ہیں۔
روس یوکرین تنازع: کیا ٹک ٹاک اپنے صارفین کو گمراہ کر رہا ہے؟
روس یوکرین تنازع میں جہاں سوشل میڈیا پر افواہوں کا بازار گرم ہے وہیں ویڈیو پلیٹ فارم ٹک ٹاک بھی غیر مصدقہ معلومات کے پھیلاؤ کے لیے استعمال ہو رہا ہے۔ کچھ تجزیہ کاروں کے خیال میں یہ پلیٹ فارم لوگوں کو گمراہ کر رہا ہے جب کہ بعض طلبہ کا کہنا ہے کہ روس اور یوکرین دونوں لڑائی کے بارے میں اپنے بیانیے کے لیے ٹک ٹاک اور سوشل میڈیا کو استعمال کر رہے ہیں۔ مزید تفصیل اس ویڈیو میں۔
