روسی فوجی نے یوکرین میں چرنوبل جوہری پلانٹ کا قبضہ چھوڑ دیا
روسی فوجیوں نے یوکرین کے چرنوبل جوہری پلانٹ کو کئی روز کے قبضے کے بعد چھوڑ دیا ہے۔
فرانسیسی خبر رساں ادارے 'اے ایف پی' کے مطابق پلانٹ چھوڑ کر جانے والے روسی فوجی اپنے ساتھ یوکرین کے نیشنل گارڈ کے ارکان کو یرغمال بنا کر لے گئے۔
اس خبر کی تصدیق یوکرین کی ریاستی جوہری ایجنسی 'اینرگواٹم' نے ٹیلی گرام پر جاری ایک بیان میں پلانٹ کے کارکنوں کے حوالے سے کی۔
البتہ یرغمال بنائے گئے یوکرینی گارڈز کی درست تعداد واضح نہیں ہے۔
یوکرین کے صدر نے دو جرنیلوں کو عہدوں سے ہٹا دیا
یوکرین کے صدر ولودیمیر زیلنسکی نے جمعرات کی شب خطاب میں دو جرنیلوں کو ان کے عہدے سے ہٹانے کا اعلان کر دیا۔
زیلنسکی نے فارغ کیے گئے جرنیلوں کو 'اینٹی ہیروز' قرار دیا۔ فارغ کیے گئے جرنیلوں میں سے ایک انٹیلی جنس ایجنسی میں داخلی سلامتی کے سربراہ جب کہ دوسرے خرسون میں انٹیلی جنس ایجنسی کا سربراہ رہ چکے ہیں۔
زیلنسکی نے کہا کہ ان کے پاس "تمام غداروں سے نمٹنے کا زیادہ وقت نہیں ہے، لیکن آہستہ آہستہ ان سب کو سزا دی جائے گی۔"
یوکرینی حکام کا کہنا ہے کہ روسی افواج نے جمعرات کو جنوبی یوکرین میں 12 بسوں کے قافلے میں موجود 14 ٹن انسانی امداد ضبط کر لی۔ امداد میں ادویات اور خوراک شامل تھی۔
روس نے کیف سے 700 یونٹس کا سامان واپس نکال لیا
یوکرین کے حکام کا اندازہ ہے کہ روس نے راتوں رات کیف سے 700 یونٹس کا سامان واپس لے کرر بیلاروس منتقل کر دیا ہے۔
وائس آف امریکہ کے جیمی ڈیٹمر نے یوکرین میں وِنیٹسیا سے رپورٹ کیا کہ یوکرین کی مسلح افواج کے ڈپٹی چیف آف سٹاف جنرل اولیکسینڈر گروزیوچ نے کہا کہ روانہ ہونے والے بکتر بند اہلکار بردار جہازوں کو مشرقی یوکرین کے ڈونباس میں دوبارہ تعینات کیا جا سکتا ہے تاکہ وہاں جارحیت کے لیے فورسز کو مضبوط کیا جا سکے۔
گروزیوچ کے بقول کیف کے ارد گرد کے علاقے کو چھوڑنے والے فوجی کافی اہم ہیں۔
رپورٹ کے مطابق ایسا لگتا ہے کہ فوجی انخلاء روسی اعلانات کے ساتھ مطابقت رکھتا ہے کہ ماسکو کیف کے ارد گرد کشیدگی کو کم کرنے اور ڈونباس پر توجہ مرکوز کرنے کا ارادہ رکھتا ہے.
یوکرین کے جنرل اسٹاف نے جمعے کو اطلاع دی کہ اس کا خیال ہے کہ روس کا مقصد خارکیو، لوہانسک اور ڈونیٹسک اوبلاستوں کے ان علاقوں پر کنٹرول حاصل کرنا ہے جن پر اس کا فی الحال قبضہ نہیں۔ اس سے پتہ چلتا ہے کہ روس فوجیوں کو مشرقی علاقوں میں منتقل کرنا جاری رکھے گا۔
تاہم روسی زمینی افواج کو مشرقی یوکرین میں اپنے قبضے کو وسعت دینے کی کوششوں میں بھی سخت مزاحمت کا سامنا ہے۔ یوکرین کے فوجی حکام کا کہنا ہے کہ ڈونیٹسک اور لوہانسک اوبلاستوں میں راتوں رات سات روسی حملوں کو پسپا کر دیا گیا۔ انہوں نے دعویٰ کیا کہ تین روسی ٹینک، دو بکتر بند پرسنل کیریئر، دو توپ خانے کو تباہ کر دیا گیا اور ایک روسی ڈرون کو مار گرایا گیا۔
ساتھ ہی روس بیلاروس میں مزید میزائل یونٹس بھی منتقل کر رہا ہے ،جو کہ یوکرین بھر میں اہداف پر بیلسٹک میزائل حملوں میں شدت کا ایک ممکنہ پیش خیمہ ہے۔
بھارت نے یوکرین پر غیر جانبدارانہ مؤقف اپنایا ہے، روس
جمعے کو نئی دہلی میں روسی وزیر خارجہ سرگئی لاوروف اور بھارت کے بیرونی امور کے وزیر سبرامنئیم جے شنکر کی ملاقات ہوئی۔ ایسوسی ایٹڈ پریس کی ایک خبر کے مطابق، ملاقات کے بعد روس نے بھارت کی تعریف کی کہ اس نے یوکرین کے معاملے پر غیر جانبدار مؤقف اپنایا ہے۔
جے شنکر نے تشدد کی کارروائیاں بند کرنے کی اہمیت کو اجاگر کیا، لیکن روس کی جانب سے یوکرین پر حملے کی مذمت سے احتراز کیا۔
لاوروف نے بھارت کی تعریف کی، جس نے، بقول ان کے، ''محض یک طرفہ نہیں، بلکہ مجموعی صورت حال کو مد نظر رکھا''۔
بھارتی وزارت خارجہ نے بتایا ہے کہ لاوروف نے بھارتی وزیر اعظم نریندر مودی سے بھی ملاقات کی اور انھیں یوکرین کی صورت حال پر بریفنگ دی، جس میں امن مذاکرات کے عمل کا معاملہ شامل ہے۔