کراچی کے شہریوں کو کرونا وائرس سے بچانے کے لیے رضاکار سڑکوں پر
پاکستان کے سب سے بڑے شہر کراچی میں کرونا وائرس کے سبب جزوی لاک ڈاؤن ہے۔ لیکن اس وبا کے خوف کو کم کرنے کے لیے کچھ خواتین رضا کار سڑکوں پر نکل کر لوگوں کو کرونا وائرس سے متعلق آگاہی فراہم کر رہی ہیں۔ دیکھیے سدرہ ڈار کی ڈیجیٹل رپورٹ میں۔
کرونا وائرس سے بچاؤ کے لیے شوبز ستارے متحرک
کرونا وائرس کا پھیلاؤ روکنے اور عوام میں شعور اُجاگر کرنے کے لیے فن کی دُنیا سے تعلق رکھنے والے ستارے بھی میدان میں آ گئے ہیں۔
بہت سے فن کاروں نے خود ساختہ تنہائی اختیار کر رکھی ہے اور عوام کو بھی احتیاطی تدابیر اختیار کرنے کے مشورے دیے جا رہے ہیں۔
بالی وڈ اسٹار شاہ رُخ خان نے بھی اپنے ٹوئٹر پیغام میں اپنے پرستاروں سے اپیل کی ہے کہ وہ حکومت کی جانب سے دی گئی ہدایات پر عمل درآمد کریں، تاکہ اس وائرس سے بچا جا سکے۔
اپنے ویڈیو پیغام میں شاہ رُخ خان کا کہنا ہے کہ دُنیا بھر کو اس وبا نے اپنی لپیٹ میں لے رکھا ہے۔ لہذٰا ہم سب کو مل کر اسے شکست دینا ہو گی۔ شاہ رُخ خان نے کرونا وائرس کے مریضوں کا علاج کرنے والے ڈاکٹرز کو خراج تحسین پیش کرتے ہوئے کہا کہ ہمیں ان کا ساتھ دینا چاہیے۔
پنجاب حکومت کی عوام سے دو روز تک گھروں میں رہنے کی اپیل
پاکستان کے صوبہ پنجاب کے وزیر اعلٰی عثمان بزدار نے صوبے کے عوام سے اپیل کی ہے کہ وہ کرونا وائرس کے پیشِ نظر دو روز تک گھر سے نہ نکلیں۔
لاہور میں نیوز کانفرنس کرتے ہوئے عثمان بزدار نے کہا کہ یہ لاک ڈاؤن نہیں بلکہ سماجی فاصلہ برقرار رکھنے کے لیے کیا گیا ہے۔
پنجاب حکومت نے صوبے بھر میں شاپنگ مالز اور سیاحتی مقامات بھی دو روز کے لیے بند کرنے کا فیصلہ کیا ہے۔
کرونا وائرس سے ایران میں 1556 ہلاکتیں، حسن روحانی حالات میں بہتری کے لیے پر امید
ایران میں کرونا وائرس سے ہلاکتوں کی مجموعی تعداد 1500 سے زائد ہو گئی ہے جب کہ ملک بھر میں 20 ہزار سے زائد افراد 'کووڈ 19' کے مریض ہیں۔
خبر رساں ادارے 'رائٹرز' کے مطابق ایران میں ہفتے کو 100 سے زائد مزید ہلاکتوں کے بعد مجموعی تعداد 1556 تک پہنچ گئی ہے۔
ایران، چین اور اٹلی کے بعد کرونا وائرس سے سب سے زیادہ متاثر ہونے والا ملک ہے۔ جمعے کو ایران میں ہلاکتوں کی تعداد 1433 اور 19 ہزار 600 سے زائد مریض رپورٹ کیے گئے تھے۔
البتہ ایران کے صدر حسن روحانی پرامید ہیں کہ آئندہ دو سے تین ہفتوں کے دوران ایران میں اس وبا کی شدت کم ہو جائے گی اور حالات معمول پر آنا شروع ہو جائیں گے۔