کراچی میں مزید 11 افراد میں کرونا وائرس کی تصدیق
کراچی میں جمعے کے روز بھی 11 مزید افراد میں کرونا وائرس کے کیسز کی تصدیق ہوئی اور اس طرح صوبے میں یہ تعداد بڑھ کر 249 تک جا پہنچی ہے۔ ان میں سے 151 سکھر میں جبکہ باقی 94 افراد کراچی میں زیر علاج ہیں۔ جبکہ تین افراد وائرس سے صحتیاب ہوچکے ہیں اور ایک شخص ہلاک ہوا ہے۔
ادھر وزیراعلیٰ سندھ سید مراد علی شاہ نے صوبے کے لوگوں پر زور دیا ہے کہ وہ آئندہ تین دن بطور ’’رضاکارانہ تنہائی‘‘ اختیار کریں تاکہ ہر ایک اپنے آپ کو محفوظ رکھ سکے۔ آئندہ تین دن کے دوران دفاتر مکمل طور پر بند ہیں ہوٹلز ڈائننگ کی پیشکش نہیں کر رہے ہیں کھیل اور جم بند ہیں، لہٰذا سڑکوں اور گلیوں میں بھی اِدھر اُدھر جانے کی ضرورت نہیں ہے۔ یہ بات انہوں نے یہاں وزیراعلیٰ ہاؤس میں کرونا وائرس سے متعلق ٹاسک فورس کے 23 ویں اجلاس کی صدارت کرتے ہوئے کہی۔
اٹلی میں ایک دن میں 627 ہلاکتیں، 6 ہزار نئے مریض
اٹلی میں کرونا وائرس کی تباہ کاریاں جاری ہے اور ہر نئے دن پہلے سے زیادہ تعداد میں لوگ ہلاک ہو رہے ہیں اور نئے کیس سامنے آ رہے ہیں۔ جمعہ کو حکام نے بتایا کہ گزشتہ 24 گھنٹوں کے دوران ملک میں 627 افراد ہلاک ہو گئے جب کہ 6 ہزار نئے مریضوں کی تصدیق ہوئی ہے۔
گزشتہ اتوار کو اٹلی میں 368، پیر کو 349، منگل کو 345، بدھ کو 425 اور جمعرات کو 427 افراد ہلاک ہوئے تھے۔ اس طرح چھ دن میں ہلاک ہونے والوں کی تعداد ڈھائی ہزار سے زیادہ ہو گئی ہے۔
ایک دن پہلے اٹلی میں 5 ہزار اور پوری دنیا میں 26 ہزار نئے کیس سامنے آئے تھے۔ جمعہ تک اٹلی میں مریضوں کی کل تعداد 47 ہزار اور ہلاکتوں کی تعداد 4 ہزار سے زیادہ تھی۔
یورپی یونین کے ایک اور رکن ملک سپین کا حال بھی بد سے بدتر ہو رہا ہے جہاں گزشتہ 24 گھنٹوں کے دوران 212 افراد جان سے ہاتھ دھو بیٹھے ہیں اور 2300 نئے کیس سامنے آئے ہیں۔ ایران میں جمعہ کو 149 افراد ہلاک ہوئے جب کہ 1200 سے زیادہ نئے مریضوں کی تصدیق ہوئی۔ فرانس میں مریضوں کی کل تعداد 11 ہزار ہو چکی ہے جب کہ 372 افراد ہلاک ہوئے ہیں۔
کرونا وائرس نے بڑے شہروں کو ویران کر دیا
کرونا وائرس کی وجہ سے دنیا بھر میں لاک ڈاؤن کیے جا رہے ہیں اور بڑے شہروں کی رونقیں ماند پڑ گئی ہیں۔ متعدد ملکوں میں کاروبار، دفاتر اور اسکول بند کر دیے گئے ہیں۔ جب کہ حکومتیں اپنے شہریوں پر زور دے رہی ہیں کہ وہ گھروں میں رہیں۔
دنیا بھر کی صورت حال کا اندازہ مقبول ویب سائٹ ارتھ کیم کا وزٹ کر کے لگایا جا سکتا ہے۔ اس ویب سائٹ پر دنیا کے بڑے شہروں میں عوامی مقامات پر لگائے گئے کیمروں سے براہ راست ویڈیوز دیکھی جا سکتی ہیں۔ ان میں کاروباری مراکز، تفریحی مقامات، مذہبی عمارات اور ساحلی علاقے شامل ہیں۔
ویب سائٹ کے فرنٹ پیج پر نیویارک شہر کے ٹائمز اسکوائر کی لائیو ویڈیو موجود ہے جو کرونا وائرس کی سب سے بہتر عکاسی کر رہی ہے۔ عام حالات میں یہ مقام شہریوں اور سیاحوں سے بھرا رہتا ہے۔ مین ہٹن کے اس مصروف ترین چوراہے کے اطراف کاروباری علاقہ اور انٹرٹینمنٹ ڈسٹرکٹ ہے۔ سال کے آغاز پر یہاں بہت بڑا جشن ہوتا ہے اور میلوں تک تل دھرنے کو جگہ نہیں ہوتی۔ آج یہاں چند افراد اور اکا دکا متحرک گاڑیاں دکھائی دے رہی ہیں۔
