بیرونِ ملک موجود امریکی شہریوں کو واپس آنے کی ہدایت
امریکہ کے محکمہؑ خارجہ نے اپنے شہریوں کو بیرون ملک سفر سے خبردار کیا ہے اور ملک سے باہر موجود شہریوں سے کہا ہے کہ وہ فوری طور پر وطن واپسی کا انتظام کریں۔ بصورتِ دیگر وہ غیر معینہ مدت تک باہر قیام رکھیں۔
امریکہ کے بیرونِ ملک مقیم شہریوں سے کہا گیا ہے کہ وہ واپس نہیں آرہے تو کسی محفوظ مقام پر رہنے کی تیاری کریں تاکہ کرونا وائرس سے محفوظ رہ سکیں۔
محکمہ خارجہ نے جمعرات کو بین الاقوامی سفر سے متعلق اپنی ٹریول ایڈوائزری کو کیٹگری تین سے چار کرنے کا اعلان کیا جو انتہائی سنگین صورتِ حال کی نشاندہی کرتا ہے۔
امریکی شہریوں کو شمالی کوریا، ایران، عراق اور یمن کا سفر نہ کرنے کے لیے اس نوعیت کی ہدایات جاری کی جاتی رہی ہیں۔ جیسے جیسے کرونا وائرس پھیلتا گیا، محکمہ خارجہ اس میں مختلف ملکوں کے نام شامل کرتا گیا۔
گزشتہ ہفتے پوری دنیا کے لیے کیٹیگری تھری کی ایڈوائزری جاری کی گئی تھی جسے اب چوتھے درجے تک بڑھادیا گیا ہے۔
سندھ میں کرونا وائرس سے پہلی ہلاکت
پاکستان کے صوبۂ سندھ کی وزیرِ صحت عذرا بیچوہو نے تصدیق کی ہے کہ کرونا وائرس کا شکار ایک مریض دم توڑ گیا ہے۔ سندھ میں اس وائرس سے ہلاکت کا یہ پہلا کیس ہے۔
صوبہ سندھ کرونا وائرس سے سب سے زیادہ متاثر ہے جہاں اس وائرس سے متاثرہ مریضوں کے 250 سے زائد کیسز رپورٹ ہو چکے ہیں۔ جمعے کو صوبائی وزیر صحت نے تصدیق کی ہے کہ کرونا وائرس کا شکار 77 سالہ مریض چل بسا جس کا تعلق کراچی سے تھا۔
سندھ میں کرونا وائرس کے بیشتر مریض وہ ہیں جو ایران سے سفر کر کے واپس پہنچے ہیں۔ سندھ حکومت نے سکھر کے لیبر ہال کو قرنطینہ مرکز بنا رکھا ہے جہاں مریضوں کی بڑی تعداد موجود ہے۔
ملائیشیا میں پابندیوں پر عمل درآمد کے لیے فوج تعینات کرنے کا فیصلہ
ملائیشیا میں کرونا وائرس کے پیش نظر عائد کردہ پابندیوں پر عمل درآمد نا ہونے کی وجہ سے مرکزی حکومت نے فوج تعینات کرنے کا فیصلہ کیا ہے۔
ملائیشیا کے وزیرِ دفاع اسماعیل صابری کا کہنا ہے کہ پابندیوں کے باوجود لوگ ہوٹلوں اور پارکوں میں جا رہے ہیں جس کی وجہ سے اتوار کے روز سے فوج کرونا وائرس کے سبب عائد کردہ پابندیوں پر عمل درآمد کرانے کے لیے گشت شروع کر دے گی۔
خبر رساں ادارے 'رائٹرز' کے مطابق ملائیشیا میں اب تک 900 افراد میں کرونا وائرس کی تصدیق ہوچکی ہے جن میں دو تہائی افراد وہ ہیں جنہوں نے پچھلے ماہ دارالحکومت کوالالمپور کے قریب منعقد ہونے والے مذہبی اجتماع میں شرکت کی تھی۔
حکومت نے بدھ کے روز سے ملک بھر میں تعلیمی ادارے، سرحد اور کاروباری مراکز بند کر دیے ہیں اور عوام کو ہدایت کی ہے کہ وہ گھروں پر ہی رہیں۔
تفتان سے زائرین کا قافلہ ملتان کے قرنطینہ مرکز پہنچ گیا
ایران سے لوٹنے والے پاکستانی زائرین کا قافلہ تفتان کے قرنطینہ مرکز سے ملتان پہنچ گیا ہے۔ صوبہ پنجاب کے رہائشی ان افراد کو ملتان کے انڈسٹریل اسٹیٹ میں قائم قرنطینہ مرکز میں رکھا جائے گا۔
33 بسوں پر مشتمل اس قافلے میں 1247 زائرین سوار تھے جنہیں 800 سے زائد کمروں پر مشتمل ایک کمپلیکس میں رکھا گیا ہے۔
اس کمپلکس میں تین ہزار سے زائد زائرین کو ٹھہرانے کے انتظامات کیے گئے ہیں۔