یورپی کمیشن اور یورپی یونین کے اہلکاروں کا بوچا کے قصبے کا دورہ
روزنامہ 'کیف انڈپنڈنٹ' نے خبر دی ہے کہ دورے پر آئے ہوئے یورپی کمیشن اور یورپی یونین کے حکام کے ہمراہ یوکرین کے رہنماؤں نے جمعے کو یوکرین کے قصبے، بوچا کا دورہ کیا۔
انھیں بتایا گیا کہ بوچا میں شہریوں کی لاشوں پر تشدد، اذیت اور پھانسیوں کے واضح نشانات تھے، جس کے بارے میں حکومتِ یوکرین کا الزام ہے کہ یہ روسی افواج کی کارستانی تھی، جو حالیہ دنوں کے دوران علاقے سے واپس چلے گئے ہیں۔
روس ان الزامات کی تردید کرتا ہے کہ اس کی فوج نے شہری آبادی کو نشانہ بنایا تھا۔
اقوامِ متحدہ کا یوکرین میں جنگ بندی پر زور
اقوامِ متحدہ کے انسانی ہمدردی امور کے سربراہ مارٹن گرفتھس نے کہا ہے کہ جنگ زدہ ملک یوکرین میں مقامی سطح پر جنگ بندی کی جائے تاکہ محصور علاقوں میں لوگوں کو امداد پہنچائی جا سکے اور انہیں باہر نکلنے کا محفوظ راستہ مل سکے۔
جینوا سے وائس آف امریکہ کی نامہ نگار لیزا شلائین کی رپورٹ کے مطابق اقوامِ متحدہ کے مارٹن گرفتھس نے رواں ہفتے روس کے وزیرِ خارجہ سرگئی لاروف سے یوکرین میں انسانی بنیاد پر جنگ بندی کے امکانات پر تبادلۂ خیال کیا۔ پیر کو وہ یوکرین جاتے ہوئے کچھ دیر کے لیے ماسکو میں رکے تھے۔
اقوامِ متحدہ کے انسانی ہمدردی امور کے انڈر سیکریٹری اور ہنگامی امداد کے رابطہ کار مارٹن گرفتھس کو اس بارے میں روس کی جانب سے کوئی ٹھوس یقین دہانی نہیں کرائی گئی۔
تاہم انسانی ہمدردی امور کے ترجمان یینز لیئرکی نے جمعے کو کہا کہ گرفتھس کا خیال ہے روس کے وزیرِ خارجہ سے ملاقات اس کوشش کی طرف پہلا قدم ہے اور ابھی اس مقصد کو حاصل کرنے کے لیے مزید بہت طویل مراحل باقی ہیں۔
گرفتھس سمجھتے ہیں کہ متحارب فریقین کو مقامی سطح پر جنگ بندی کے لیے راضی کرنا بہت ضروری ہے۔
ترجمان لیئرکی نے کہا کہ ماریوپول جیسے شہروں میں گولیوں کو بند کرانا ہماری اولین ترجیح ہے۔ یہاں پھنسے ہوئے شہریوں کو محفوظ طریقے سے نکالنا ہوگا اور انہیں ان کی پسند کی جگہوں پر جانے کی اجازت دینی چاہیے۔
ماریوپول کا محاصرہ گزشتہ چھ ہفتوں سے جاری ہے اور یہاں بیشتر املاک روس کی بمباری سے تباہ ہو چکے ہیں اور لاکھوں شہری بنکروں میں پناہ لیے ہوئے ہیں۔
اقوامِ متحدہ کے انسانی امور کے ترجمان لیئرکی کا کہنا ہے کہ یوکرین کے دورے میں گرفتھس نے اپنی آنکھوں سے بوچا، ارپن اور دارالحکومت کیف کے مضافات میں موت، تباہی اور بربادی کے ہولناک مناظر دیکھے ہیں۔
انہوں نے کہا ہے کہ مبینہ طور پر روس کی فوج نے جو مظالم ڈھائے ہیں ان کے بارے میں تفتیش ہونا چاہیے۔
ترجمان لیئرکی کا کہنا ہے کہ اقوامِ متحدہ کو امید ہے کہ لوہانسک اور ڈونیسک میں جاری لڑائی میں ماریوپول جیسی صورتِ حال پیدا نہیں ہوگی۔
انہوں نے کہا کہ امدادی رابطہ کار گرفتھس اس بات پر بہت پریشان ہیں کہ مشرقی یوکرین کے روسی زبان بولنے والے علاقوں میں حالات کتنے دگرگوں ہو سکتے ہیں۔ یوکرین سے واپسی پر انہوں میڈیا سے کہا تھا کہ وہ جنگ بندی کے بارے میں زیادہ پر امید نہیں ہیں۔
یوکرین: کیف کے نزدیک اجتماعی قبر سے درجنوں شہریوں کی لاشیں برآمد
یوکرین کے دارالحکومت کیف کے نزدیک واقع گاؤں بوزووا سے ایک اجتماعی قبر ملی ہے۔ جس میں درجنوں یوکرینی شہریوں کی لاشیں دفن تھیں۔
حکام کے مطابق یہ قبر گاؤں بوزووا میں ایک پیٹرول اسٹیشن کے قریب بنائی گئی تھی تاہم حکام نے تاحال برآمد ہونے والی لاشوں کی تعداد کا تعین نہیں کیا ہے۔
یوکرین میں روسی حملے کے بعد شہری ہلاکتوں میں اضافے کے بعد دنیا بھر سے مذمتی بیانات جاری کیے جا رہے ہیں جب کہ روس پر نئی پابندیاں بھی عائد کی جا رہی ہیں۔
روس کی یوکرین کے ساتھ قیدیوں کے تبادلے کی تصدیق
روسی انسانی حقوق کی کمشنر ٹاٹیانا موسکالکووا نے ہفتے کے روز تصدیق کی ہے کہ روس اور یوکرین نے ہفتے کے روز قیدیوں کا تبادلہ کیا ہے۔
موسکالکووا کے مطابق قیدیوں کے تبادلے میں روسی اٹامک انرجی کارپوریشن کے 4 ملازمین سمیت فوجی اہل کار بھی شامل ہیں۔
کمشنر نے اپنے ایک بیان میں بتایا ہے کہ صبح کے وقت قیدی ایک ہوائی جہاز کے ذریعے روس پہنچ گئے ہیں۔