آسٹریلیا میں غیر ملکی سیاحوں کا داخلہ بند
جمعے کے دن سے آسٹریلیا میں غیر ملکی سیاحوں کا داخلہ بند کر دیا گیا ہے، تاکہ کرونا وائرس کو پھیلنے سے روکا جا سکے۔ فلائٹس منسوخ ہونے کی وجہ سے بین الاقوامی سیاحوں کو سخت پریشانی کا سامنا ہے۔
تازہ ترین اطلاعات کے مطابق، آسٹریلیا ایک قلعے کی صورت اختیار کر رہا ہے اور جمعے کے دن سے غیر ملکیوں کو آسٹریلیا میں داخلے کی اجازت نہیں ہوگی۔ اس سے پہلے چین، ایران، جنوبی کوریا اور اٹلی سے آنے والے مسافروں کا داخلہ بند کیا گیا تھا۔
سنگاپور میں کرونا وائرس سے پہلی دو ہلاکتیں
سنگاپور نے ملک میں کرونا وائرس سے ہونے والی پہلی دو ہلاکتوں کی تصدیق کر دی ہے۔
سنگاپور کی وزارتِ صحت سے جاری بیان میں کہا گیا ہے کہ 'کووڈ 19' میں مبتلا ایک 75 سالہ خاتون ہفتے کو ہلاک ہو گئی ہیں۔ وہ 23 فروری سے اسپتال میں داخل تھیں۔
دوسری ہلاکت ایک 64 سالہ انڈونیشین شہری کی ہوئی ہے جو سنگاپور میں مقیم تھا۔ مذکورہ شخص کرونا وائرس کے علاوہ دل کے عارضے میں بھی مبتلا تھا اور 13 مارچ سے اسپتال میں داخل تھا۔
سنگاپور میں کرونا وائرس کے 385 کیسز رپورٹ ہو چکے ہیں جن میں سے تقریباً نصف تعداد بیرونِ ملک سے سنگاپور آنے والوں کی ہے۔
دو ہلاکتوں کے بعد سنگاپور نے حفاظتی اقدامات مزید سخت کر دیے ہیں۔ سنگاپور میں داخل ہونے والے تمام افراد کو پابند کیا گیا ہے کہ وہ 14 روز قرنطینہ میں لازمی گزاریں۔
امریکہ کی دو مزید ریاستوں میں لاک ڈاؤن، سات کروڑ امریکی گھروں میں محصور
کرونا وائرس سے بچاؤ کے لیے امریکہ کی ریاست نیویارک اور الینوائے نے بھی جمعے کو مکمل لاک ڈاؤن کر دیا ہے اور شہریوں کو گھروں سے نہ نکلنے کی ہدایت کی ہے۔ یوں کیلی فورنیا سمیت امریکہ کی تین ریاستیں اب لاک ڈاؤن میں ہیں۔
خبر رساں ادارے 'ایسوسی ایٹڈ پریس' کے مطابق کرونا وائرس کے باعث امریکہ کی تین ریاستوں میں لگ بھگ سات کروڑ شہری گھروں میں محصور ہو کر رہ گئے ہیں۔ حکام نے شہریوں کو غیر ضروری طور پر گھروں سے نہ نکلنے کی ہدایات دی ہیں۔
لاک ڈاؤن کے باعث امریکہ کے تین بڑے شہر نیویارک، لاس اینجلس اور شکاگو بھی بند ہیں۔ سان فرانسسکو اور سان ڈیاگو بھی لاک ڈاؤن میں ہیں۔
نیویارک کے گورنر انڈریو کوؤمو نے جمعے کو کہا کہ اب زندگی معمول کے مطابق نہیں رہی ہے۔ اسے تسلیم کریں، اس کا ادراک کریں اور اس صورتِ حال کا مقابلہ کریں۔
چین میں کرونا وائرس کے سبب عائد پابندیوں میں نرمی
چین کے قومی صحت کمیشن نے ہفتے کو رپورٹ کیا ہے کہ ملک میں گزشتہ تین دن کے دوران کرونا وائرس کا کوئی مقامی کیس سامنے نہیں آیا ہے۔ البتہ گزشتہ 24 گھنٹوں کے دوران بیرونِ ملک سے آنے والے 41 افراد میں کرونا وائرس کی تشخیص ہوئی ہے۔
چین نے کرونا وائرس کی وبا پر بڑی حد تک قابو پا لیا ہے اور اب لوگوں پر عائد پابندیوں میں بھی نرمی کی جا رہی ہے۔
کرونا وائرس سے سب سے زیادہ چین کا شہر ووہان متاثر ہوا تھا جہاں سے یہ وبا پھیلنا شروع ہوئی اور اب پوری دنیا میں پھیل چکی ہے۔ لیکن اب ووہان میں بھی رفتہ رفتہ معمولاتِ زندگی بحال ہونے لگے ہیں۔
ووہان میں حکام نے ان علاقوں میں سپر مارکیٹس اور دکانیں کھولنے کی اجازت دے دی ہے جہاں کرونا وائرس کا کوئی کیس رپورٹ نہیں ہوا ہے۔ فی الحال یہ دکانیں صبح نو بجے سے شام چھ بجے تک کھلیں گی۔
اس کے علاوہ ہر گھر کے ایک فرد کو روزانہ باہر جانے کی اجازت دے دی گئی ہے تاکہ وہ سامان کی خریداری وغیرہ کر سکیں۔
دوسری جانب بیجنگ کے چڑیا گھر نے بھی اعلان کیا ہے کہ وہ بیرونی حصہ لوگوں کے لیے کھول رہے ہیں۔ لیکن آنے والوں کو احتیاطی تدابیر اختیار کرتے ہوئے ماسک پہننا ہوگا اور ایک دن قبل ریزرویشن کرانی ہو گی۔